La Reversible

María Teresa González nació en 1950 en Gijón, donde murió en 1995. PIEL DE BREA     I Vienes, de la ciudá que bilta nes esferes espertando a los llobos de la nueche. De la hora más erma, de cansinos camientos de rabia y de tristura. Del roce de les manes qu’enxamás s’algamaron, ocres sableres de separtaes playes. De la zume salina xorreciendo, d’esi instante oportunu del olvidu desdexáu sobre un cuerpu cualuquiera. Surdes baxo la piel de brea recorriendo les cais, de xuru indiferente a tolos mieos qu’al cantil de los llabios se detienen. De les fontes qu’escancien los ácedos insomnios, los vértigos xabaces, peñerándose inciertos peles terques lluceres de los güeyos. Pétame, nostante, agora derromper esa voz que glaya nos silencios, ufiertar a l’almuhada la trona de los besos. Quiero, pa que t’allugue’l suañu, averate a lo vieyo, a la inmortal memoria de los cuentos, al xuegu d’una neña qu’un día –cuantayá– naguare ser princesa.   ...